老媽子

今天晚上，老媽子又無端走過來正在上網的我身邊。

「唉，生女真係無用。」
真是例牌的開場白, 對此, 我已經聽到慣哂, 無哂反應了。不過為了關心佢的感受, 我還是得循例問一問：
「點解又咁講呀？」

通常, 都是為我和二家姐都未結婚或搵唔到錢之類的事才會這樣說。
點知, 今次又有新鮮野...

「如果生仔的話, 就有孫仔孫女陪下我, 我而家好悶好無聊, 如果唔係有電視劇睇, 我都唔知日子點過。」下, 真係O哂咀。

大家姐的兩個仔女之前也不是一直跟你住嗎? 如果你而家掛住佢地既話, 大可以過去果邊陪佢地的, 我咁大個人, 其實可以自己照顧自己架了。

對於老媽子的無理抱怨, 我同二家姐都已經慣哂, 二家姐依然我行我素, 過她想過的生活, 而我亦一樣, 不會因為老媽子成天在羨慕別家孩子賺錢多而選擇自己不想行的路。我知道, 老媽子總是在羨慕別人, 幾十年的老毛病, 不容易改。

我記得有一次, 我終於因為老媽子成日拿人地個女D成績黎同我比較, 而嬲左佢成個禮拜。
我當時反駁說：「點解我無怨你地窮, 你就成日嫌我讀書讀得唔好？點解你成日要追求名次？」然後蹲在廚房裏放聲哭了起來。

我那對盲婚啞嫁父母生了三個女, 大女同二女都生得似老豆, 而老豆係村入面出了名的俊男, 所以大女同二女固之然係兩個靚女。而三女兒我, 生得極似老媽子----細眼, 扁鼻, 粗眉, 一副惡形惡相。由於強大的對比, 我自小就被不停地比較。阿媽為了表示自己的謙虛(事實佢真係一個好老實的人), 就成日於人地面前話：三女生得好似我咁醜樣, 佢兩個家姐就靚得多了。所以, 自我懂事以來, 我就知道自己係一個「醜樣的」女人, 亦「享受」過唔少「醜女」專有的待遇。

別人說：相由心生, 該我說, 相由言生。如果有讀過心理學的, 都會知道語言對一個人的影響有幾大。

不過, 雖然如此, 但我仍然覺得老媽子係我一生中最愛。因為, 佢對我所造成的無形的傷害, 並非佢的本意, 而係由於佢本身的性格弱點使然, 而佢對我的愛, 更是無人能及, 就連大家姐都妒忌錫我多過錫佢(唉, 都係一個鍾意比較的人!)。所以, 雖然佢唔係太識做人阿媽, 半點都唔識做門面工夫, 但確係一個好錫我的阿媽。:)

所以, 你看, 我現在不是也過得不錯嗎？
真愛無敵！YEAH！^.~v