自省

昨日，因某些原因， 引起了我對店員同事的不滿，最後索性坦白地提出一些我一直不願說出的感受。

其實，在現實生活中，除了最熟悉的一兩個朋友，我一直都是一個將心事收得好埋的人，無看這個BLOG的人，未必知道我真正諗緊咩。亦即是，若非工作上的必要，我未必會直接表達對人的不滿，或表達自己的情緒，而是自己將件事收埋，然後自己諗埋一邊。

其實我一直為呢位同事剛來時，在我放假時向其他分店店員「請教」，私自調動雜誌位置、整理倉房的事感到耿耿於懷。因為我知道她的出發點基於想爭取表現，希望增加業績，故此，當時便笑笑口地稱讚佢地好努力，做得唔錯。但我的內心，其實唔係太高興。自己的店員，竟寧願向其他人請求協助，而非走黎問我，令我感到不受尊重，亦會諗，唔通我無野值得佢去學，我執得差，所以佢要請教其他人？自此之後，我不會特別教佢野，我將佢的責能限制係某一個範圍裏面，除了因為佢資質有限之外，也可能跟這事有關。

另一件事，係每當放工之後，佢總是急急腳走另一條通往地鐵站的路，我好奇怪，大家都是搭地鐵，點解佢要行另一條路？我以為，佢想在工作之外盡快避開我。

尋晚，我終於向佢講出呢兩單唔係太令我開心既野。佢緊張地回答說，初來當時，一心只為爭取表現，無諗過會令我唔開心，亦覺得我教佢既野好有用，從來沒有過不尊重我的想法。而且，佢一直當我係朋友，所以有咩心事都會同我講，包括朋友、家人的事，都會一一跟我說起。至於分開行，是因為之前朋友成日接我收工，所以佢不方便打擾，才自己走另一條路，久而久之，便習慣成自然了。我打了個突，想想，亦是。

我再問佢，真係無為平時佢做錯野時，我對其毫不客氣的責罵而唔開心(我自己是這樣認為的)？真係唔覺得我對佢好差咩(我覺得我對之前兩位同事好得多了)？佢話，只是這晚才發現我對佢的觀感原來咁差，而佢從來都唔覺得我對佢差。

是我掩飾得太好，還是她太單純了？

經過呢件事，我很欣賞佢為人際關係所作出的努力，令我自愧不如，總認為，如果人家不喜歡我、誤解我，便由佢地去吧，想我解釋？好難。除非我真係極之極之極之重視呢個人。人際關係中，我想負面的事總比正面的多， 且極不容易信任人。

原來，一切可以很簡單。點解我一開始唔正面去諗呢？而又唔肯坦白呢？一切都是面子作怪吧。

今日，我向另一個人提出一句一直擺係我心入面既說話，只是希望將呢句說話釋放返出黎，可以將件事放下。